Rybarjo, hosćencarjo a turistikarjo wo přichodźe łužiskeje ryby diskutowali
Stróža (SN/BŠe). Łužiska ryba, wosebje karp, ma imagowy problem. Mnohim ludźom, zwjetša młódšeje generacije, wudźěłk dźensnišemu trendej hižo njewotpowěduje. W regionje plahowana ryba trjeba tuž nowy wonkowny wobraz, zo móhła kupcow zaso sylnišo wabić. To bě mjez druhim tema na wčerawšej dźěłarničce rybarjow, hosćencarjow, turistikarjow a dalšich akterow w Stróži. Zarjadowanje wotmě so we wobłuku projekta Marketingoweje towaršnosće Hornja Łužica-Delnja Šleska, kotraž ma marku łužiska ryba skrućić.