Bliskowobchad ma koronakrizy dla z wulkimi stratami ličić

Budyšin (SN/BŠe). Mobilita w času koronakrizy je so změniła. Tónle zjaw je wosebje za poskićerjow bliskowobchadnych srědkow fatalny. „Ličby sobujěducych wotsrjedź měrca hač do spočatka meje su so jasnje pomjeńšili. Dojězdźowarjo njejsu na dźěło jězdźili, šulerjo njejsu do šu­le chodźili, a turistow tohorunja nima­le žanych njebě“, zdźěli Sandra Trebesius z nowinskeho běrowa wobchadneho zaměroweho zwjazka Hornja Łužica-Delnja Šleska (ZVON). Tohodla su poskitki najprjedy raz přiměrili. Ze zběhnjenjom wobmjezowanjow pandemije dla su krok po kroku reagowali a na přikład šulerjam 10. lětnikow kaž tež abiturientam zwiski do kubłanišćow zmóžnili.