Mnozy chcedźa so w prózdninach we łužiskej jězorinje wočerstwić

Zły Komorow (SN/mwe). W dowolowej se­zonje je łužiska jězorina wosebje mjez swójbami a młodymi ludźimi jara wob­lu­bowana. Wšako skići za aktiwity na čerstwym powětře kaž tež při a na wodźe wjele móžnosćow. Hižo wokoło nje­dawnych swjatkownych swjatych dnjow bě při Třižonjanskim, Bjerwałdskim, Lejnjan­skim a Złokomorowskim jězorje njedaloko Hamo­ra, Łaza, Wojerec a dru­hdźe widźeć, što tam lětsa zaso na wobydlerjow čaka. Tak běchu parkowanišća z bydlenskimi mobilemi ze wšěch kónčin republiki, předewšěm pak z Drježdźan, Mišna a Pirny, zastajane. Z derje wutwarjenej syću za koleso­warjow a skaterow a 1 900 na taflach napisanych čarowych kilometrow skića w jězorinje dosć městna, so aktiwnje pohibować. Płuwać a při wodźe wočerstwić móža so prózd­ninarjo w cyłkownje 20 jězorach. „Dodźeržeć wotstawki a předpisy hygieny pak je dale trjeba“, zdźěli Katja Wersch ze Złokomorowskeho běrowa turistiskeho zwjazka Łužiska jězorina.