Minjene tři njewšědnje horce lěta su Klětnjanskemu hatarstwu wulke starosće načinili. Wótku do pola ćisnyć pak rybar Dietmar Bergmann přiwšěm nochce – hišće nic.
Klětno (CK/SN). Kónclětna předań karpow, pstruhow a dalšich družin ryby je dawno nimo. W swojim Klětnjanskim hatarstwje mataj Dietmar Bergmann a jeho sobudźěłaćer Friedhelm Petrick najebać to wjele dźěła. W najwjetšim dźělu hatow je w zymje woda wotpušćena. To je wobswětej najpřihódniša desinfekcija, hdyž dno tak porjadnje přemjerznje. Kromy hatow dyrbja rybarjo skrućeć, ale tež saki a mašiny zwuporjedźeć. Spočatk februara započnu potom zaso wodu do hatow pušćeć – jeli woda budźe.
