Hižo třeći tydźeń přistajeni wobłuka metalo- a elektroindustrije w Berlinje, Braniborskej a Sakskej stawkuje. Tež we Łužicy zasydlene zawody su wot warnowanskich akcijow potrjechene.

Budyšin (SN/BŠe). Cyłkownje něhdźe 150 sobudźěłaćerjow Zhorjelskeho a 100 Budyskeho zawoda francoskeho koncerna Alstom je wčera, srjedu, znowa stawkowało. Mjeztym zo su přistajeni Zhorjelskeje wagonownje dopołdnja protestowali, slědowachu Budyscy kolegojo připołdnju. Ze stawkom dźěłarnistwo IG metal připowědźeny ćišć w mjeztym hižo třećim tydźenju zesylnja. „Dźěłodawarjo njemóža so hižo wuwinyć. Žadamy sej kmany tarifowy poskitk“, podšmórny wčera prěni społnomócnjeny dźěłarnistwa we wuchodnej Sakskej Jan Otto.