Za čas koronapandemije přetrjeba wody po cyłym Zwjazku přiběrała

Budyšin (SN/BŠe). Woda je drohotna resursa, bjez kotrejež ludnosć, přiroda a zwěrina njepřežiwi. Ćim wažnišo je, zo z njej zamołwiće wobchadźamy. Přiwšěm su priwatne domjacnosće loni jasnje wjac wody přetrjebali, přerěznje něhdźe štyri litry wjace na wosobu.

Kaž Zwjazk energijoweho a wodoweho hospodarstwa (BDEW) zdźěli, wučinješe přetrjeba pola něhdźe 129 litrow na wosobu a dźeń. Jako hłownu přičinu mjenuje wuskutki koronapandemije. „Homeoffice, wobmjezowanje kontaktow, wupadnjene jězby atd. wjedu k tomu, zo su ludźo doma a wotpowědnje wjace wody přetrjebuja“, wuswětla hłowny jednaćel BDEW Martin Weyand. Mějo so po naprawach hygieny su sej ludźo tež časćišo a dlěje ruce myli. Suchoty dla su tohorunja w swojich zahrodkach wjace wody trjebali. We wobchodach abo w předewzaćach porno tomu trjebachu mjenje wody, wšako běchu dlěši čas zawrjene.