Markus Posch chce hač do lěta 2028 Kulowski měšćanosta wostać – Žiwa dwurěčnosć je jemu jara wažna
W Kulowje a jědnaće wjesnych dźělach 9. meje měšćanostu wola. Z Markusom Poschom (CDU) maja tónraz jeničkeho kandidata. 51lětny je wot 2014 měšćanosta. Z hesłami kaž „Ja so wo to staram“ a dalšimi wabi wón na plakatach wo dowěru wobydlerjow. Wo jeho motiwaciji a wobsahach jeho dźěła je so Andreas Kirschke z nim rozmołwjał.
Knježe Poscho, při zašłych wólbach měšćanosty sće štyrjoch sobukandidatow měł. Čujeće so to lětsa někak samlutki?
M. Posch: To móžeš widźeć, kaž chceš. Jónu to pokazuje, zo je wot 2014 bjezdwěla něštožkuli derje běžało a rěči za dobre dźěło w měšćanskim zarjadnistwje. Wotbłyšćuje pak tež wulku zamołwitosć, kotrejž chcu znowa wotpowědować.
Što Was za to motiwuje?
M. Posch: Chcu wobydlerjam blisko dźěłać a na docpěte nawjazać. Štož płaći, su wuslědki.
Što sće wot lěta 2014 docpěł?
