Mjez kolesowarskimi turami poručeja jednu po Dubrjenskim bahnje

Zły Komorow (AK/SN). Wobmjezowanja za pućowanje do wukraja koronapan­demije dla su wuskutkowali, zo je zajim turistow za łužisku jězorinu přiběrał. Chcedźa tuž wjace wopytowarjow wo tudyšich móžnosćach wočerstwjenja in­formować. Nic naposledk tohodla wuda krajej přesahowacy turistiski zwjazk Łužiska jězorina z.t. nětko nowu, kom­paktnu wulku přehladnu kartu, kaž nowinska rěčnica Katja Wjersch informuje. Wopy­towarjo regiona a tudyši wočer­stwjenje pytacy móža z nowej kartu puć k wulětnym cilam mjez Zelenogózdźanskim łuhom (Grünewalder Lauch) na zapadźe, Grodkowskim spjatym jězorom na sewjeru a Bjerwałdskim jězorom na juhu poměrnje jednorje namakać. „Kompaktna fałdowana karta podawa wob­šěrny přehlad a mnohe ideje za kolesowanje, za aktiwity we wodźe a na njej, za do­žiwjenske tury po měnjatej krajinje, za industrijnu kulturu k dótkanju, za wulětnu gastronomiju a prózdninske kwartěry“, Katja Wjersch rozłožuje.