Hłowna zhromadźizna agrarneje akcijoweje towaršnosće Sorabia je drje něšto lěpšu, ale přiwšěm njespokojacu dźěławosć w lěće 2020 bilancowała.

Nowoslicy/Róžant (JK/SN). „Z mlokowej produkciju Sorabia steji a padnje. Smy mjenje abo bóle k tomu zasudźeni w Hrańcy dale mloko produkować“, bě jedne z hłownych wuprajenjow nawody předsydstwa Róžeńčanskeje agrarneje AG Sorabia Mateja Korjeńka na wčera­wšej 29. hłownej zhromadźiznje towaršnosće w Nowoslicach.

Minjene lěto bě Sorabia z lěpšim wu­slěd­kom hač w lětomaj do toho zakón­čiła, ale předsydstwo kaž tež dohladowanska rada njejstej z wuslědkom spokojom. Pod smužku w bilancy dale čerwjene ličby pisaja. Drje nic wjac tak wulke kaž w lětach do toho, ale přiwšěm nic tajke, zo móhli swojim akcionaram zaso jónu diwidendu wupłaćić.