Tydźenja su w Błótach lětušu sezonu zahajili. K jutram wočakuja tamniši turistikarjo tójšto hosći, byrnjež mnozy z nich pozdźišo hač hewak knihowali. Runje tak chcedźa serbsku stronku zaměrnišo zapřijeć a k tomu jedyn projekt k lětnim prózdninam zahajić.
Raduš (SN/at). Wjedro bě mało nalětnje k startej sezony. To pak wopytowarjow wotdźeržowało njeje: „Cyle nawopak, w Lubinje a Lubnjowje běštej minjeny kónc tydźenja tradicionalnej přepodaći wjasła derje wopytanej“, zdźěli Silvia Jonas, nowinska rěčnica Turistiskeho zwjazka Błóta ze sydłom w Radušu pola Wětošowa. Zo buštej twar a wužiwanje błótowskich čołmow do zwjazkoweho zapiska imaterielneho kulturneho namrěwstwa zapřijatej, je za nju „wjeršk“.