Zły Komorow (SN/AK). Z pomocu nowowuwitych awdijoguidow móža sebi wobydlerjo a turisća Łužisku jězorinu wotkryć. Wo tym informowaše turistiski zwjazk Łužiska jězorina. „Nowe awdijoguidy, na kotrež móžeš bjezpłatnje přez app Hearonymus na šmóratku posłuchać, skića wulkotnu móžnosć, so hłubšo do stawiznow, kultury a wuměłstwa regiona zanurić“, praji Katja Wersch, sobudźěłaćerka za zjawnostne dźěło a marketing zwjazka. „Awdijoguidy buchu specielne za to wuwite, wopytowarjam informatiwny a zajimawy wopyt zmóžnić, dołhož sej łužiske muzeje a města w swójskim tempje wotkrywaja.“

W Gubinje na přikład zaběra so guide na přikład ze stawiznami města na bokomaj Nysy. Tak rozkładuje wón historiske twarjenja, dróhi a naměsta. Runje tak naspomni wón anekdoty a pozadkowe informacije. Tute sahaja ze zašłych lětstotkow hač do dźensnišeho. Start tury w Gubinje je při dwórnišću. Z pomocu integrowaneje karty dóńdu wopytowarjo wšelakim zajimawostkam. Ilustrowane su słuchowe přinoški z fotami.