Radwor/Miłoćicy/Róžant (SN/BŠe). Němski burski zwjazk je tele dny bilancu žnjow rozłožił. Tak wuchadźeja zamołwići z toho, zo změja ratarjo wunoški pod přerězkom. Wina na tym je włóžne nalěćo, suchej měsacaj meja a junij kaž tež spadki w běhu žnjow. „Žně w našimaj ratarskimaj zawodomaj běchu lěpše hač wočakowane“, wuzběhny jednaćel Zarěčanskeje a Radworskeje agrarneje towaršnosće Stefan Triebs. Wón so wjeseli, zo cyłoněmska prognoza za region njepřitrjechi. Ze syčomłóćawami žnějachu ratarjo minjene tydźenje ječmjeń, pšeńcu a rěpik. Hladajo na ječmjeń a pšeńcu mějachu na polach wokoło Radworja, Zarěča a Rakec samo nadpřerězne žně. Něhdźe dźesać do pjatnaće procentow płoniny pšeńcy su hišće do spadkow kónc julija dochowali. Po tym je dešć swoje slědy zawostajił. „Zornjatka pak su jara dobre, słoma skerje špatna“, Triebs wuswětli. Wunošk rěpika bě lětsa přerězny a rožka na polu mjez Radworjom a Chasowom trochu nad přerězkom.