Bjesada při róžni: Astrofyzikarjo su zhromadnosć z ludnosću pěstowali
Konjecy (SN/mb). Němski centrum za astrofyziku (DZA) rěka wot wčerawšeho nětko takrjec cyle oficialnje po serbsku „Astrocentrum Łužica“. To su prof. Christian Stegmann, designowany załoženski direktor DZA prof. Günther Hasinger a předsyda Domowiny Dawid Statnik na dworje domu towarstwow w Konjecach zjawnosći zdźělili. Dwěsćě ludźi z wokoliny je na lětušu bjesadu při róžni ze zamołwitymi DZA přichwatało. Na lońšim zetkanju bě sej Józef Woko ze Šunowa přał, zo Hasinger z kulturnym programom wustupi, jeli so DZA we wubědźowanju wo spěchowanje wulkoslědźenišća přesadźi. Wšako hudźeše Hasinger, direktor za slědźenje europskeje swětnišćoweje organizacije ESA, za čas młodosće w rockowej skupinje. Wčera je mjeztym 69lětny na gitarje a spěwajo přeće spjelnił a wulki aplaws zahoriteho publikuma žnjał. Jeho spektrum sahaše wot skupiny Beatles hač Gundermannej.