Čorna Pumpa (JoS/SN). Na dnju wotewrjeneho wukubłanja bě energijowe předewzaće LEAG do swojeho stejnišća w Čornej Pumpje přeprosyło. Něhdźe 340 wopytowarjow je minjenu sobotu přišło. Zo běše lětuše zarjadowanje dwaj měsacej prjedy hač w minjenych lětach, „ma swoju přičinu. Smy loni dobre nazhonjenja při planowanju wučomnikow měli a to ma tak wostać. Lětsa smy požadansku kampanju hižo w meji zahajili. Dyrbimy spěšni być, zo bychmy předewšěm najlěpšich požadarjow našli“, rjekny Axel Ziller, nawoda wukubłanja hórnistwo a milinarnje. Za přichod trjeba LEAG dobry dorost.
We wukubłanskim lěće 2024 LEAG w dźesać powołanjach wukubłuje. Železnicar w zawodnej słužbje mjez tymi wjace njebudźe. LEAG 78 wukubłanskich městnow sama wobsadźi. Dalše přińdu wot partnerow, tak w Janšojskim wukubłanišću 136 wot Němskeje železnicy za nowu porjedźernju ćahow ICE w Choćebuzu. Dalšej wažnej partneraj su towaršnosć Łužiska woda zwr a Choćebuske zawody za zastaranje z energiju.
