Grodk/Podstupim (dpa/SN). Hačrunjež njejsu krajne zarjady plany za wudobywanje kopora kołowokoło Grodka schwalili, nochce hórniske předewzaće KSL swój wotmysł spušćić. Blas Urioste, regionalny manager firmy, je wutoru powěsćerni dpa zdźělił, zo chce KSL dale cyłych 50 milionow eurow inwestować, zo by jednanja k wuspěchej wjesć móhła. Po swojich planach chce KSL podzemsce kopor we hłubokosći 800 do 1500 metrow w kónčinje mjez sewjernym Grodkom a gmejnu Slepo wudobywać. Za to chcyše we wokolinje tež připrawy za rjedźenje kopora natwarić. Po pruwowanju podłožkow pak zwěsći Krajny planowanski wotrjad Berlin-Braniborska wjacore problemy – na přikład móžne suwanje spódka jako wuskutk wudobywanja, zawodowanje z chloridom a sulfatom zanjerodźeneje jamoweje wody do Sprjewje, kaž tež wotewrjene prašenja nastupajo pitnu a wšědnu wodu. Po měnjenju pruwowarjow njejsu zapodate podłožki w tutych dypkach jasne dosć, zo bychu plan schwalić móhli. „Smy wot zarjadow ‚domjace nadawki‘ dóstali, kotrež dyrbimy nětko nanajspěšnišo spjelnić“, praji Urioste.