Ratarske zawody žadaja sej dale njeběrokratisku podpěru ministerstwa

Budyšin (SN/BŠe). Ratarjo po cyłej Sakskej dóstanu wurunanske płaćenja za zdokonjane wukony w zwisku ze škitom přirody pozdźišo a nic kaž zwučene na kóncu lěta. Dokładnje dźe wo sumu 241 milionow eurow. Něhdźe 7 000 ratarskich zawodow je potrjechenych. Zhonili su burja tole kónc oktobra, jako dóstachu mejlku krajneho zarjada za wobswět, ratarstwo a geologiju (LfULG). Za zawody je to šok a katastrofa, dokelž z pjenjezami kruće liča. „Poprawom běchu wone kóžde lěto z dypkom 27. decembra na konće předewzaćow“, zwurazni předsyda burskeho zwjazka Budyšin-Kamjenc Stefan Triebs, kiž je zdobom jednaćel Radworskeho a Zarěčanskeho agrarneho drustwa.