Na druhim domjacym hrajnym dnju sezony w sakskej klasy steješe za wolejbulistow ST Viktorije Worklecy jara kontrerny program na planje. Mjeztym zo čakaše w druhej hrě přećiwo MSV Budyšinej něšto podobne kaž winowatostny nadawk, běše najprjedy z módro-běłymi z Wojerec napřećiwnik jasny faworit.

ST Viktoria Worklecy – VF Módro-běli Wojerecy 1:3 (25:19, 25:27, 22:25, 14:25)

Tola wolejbulisća Viktorije dźěchu z nastajenjom do hry, zo je přeco překwapjenka móžna. A tak startowachu z połnej paru a kuražu do prěnjeje sadźby. Hosćo so dźiwachu, jako so jim hnydom na spočatku dwójce blok před nohi prasny. Domjacy sej hnydom někotre dypki předskoka wuhrachu. Potom pak bě sadźba hač do 20:18 wurunana, prjedy hač zaso jara sylny Šćěpan Wjeńka ze seriju nadaćow wěsty předskok wunuzowa. Poslednje tři nadaća słušachu kapitanej Ludwigej Eckertej a faworizowany hósć z Halštrowskeho města bě poraženy. Wjace hač 70 přihladowarjow bě zahorjenych.