Serbski kowar Matej Hrjehor za měsac Łužicu wopušći a to znajmjeńša na tři lěta. Po róžowej póndźeli poda so rjemjeslnik na pućowanje po swěće – jako wandrowski. Jako zajimc pod 30 lětami, kiž njeje zadołženy, kiž nima dźěći a njeje woženjeny, chce wuwučeny rjemjeslnik dale wuknyć. Delni Sulšečan wě derje na pućach, kotrež su kamjenjojte, kročić. Hižo jako serbski skawt je wón nawuknył pod jednorymi wuměnjenjemi žiwy być. Swoje rjemjesło jako kowar je daloko zdaleny wot Łužicy, w Tübingenje nawuknył. Potom je w Berlinje a Drježdźanach w modernych předewzaćach dźěłał.

W Čornym Chołmcu porno tomu měješe njedawno składnosć, swoje rjemjesło na tradicionalne wašnje předstajić. Na Krabat-Mystica je wón tři dny kował a na mnohe prašenja wotmołwił. „Mějach mnohich zajimowanych přihladowarjow“, 28lětny rjekny, „wjele je mi powědało, zo su něhdy same powołanje kowarja nawuknyli. Někotři nanojo su swojim dźěćom tež wo kowanju powědali, štož sym tu a tam ze swojej wědu wudospołnił.“