Załožba Slavonic Europe swoju wiziju we Wětošowje předstajiła

Puć do słowjanskeho hrodźišća blisko Raduša na tejle januarskej póndźeli powabny njeje. Sně taje. Woda a zbytki lodu na puću skutkuja kaž přirodny zadźěwk. Kedźbliwje dyrbiš kročić, zo so njewobsunješ a swój zaměr wěsće docpěješ. W pozadku šumi wobchad na awtodróze A 15. Maja šoferojo w připołdnišej hodźinje scyła wid na to, štož nalěwo a naprawo magistrale leži?

Poprawom su muzeje skoro po wšej Němskej póndźelu zawrjene. A nimo toho je zyma. Za pomnik starych Słowjanow to njepřitrjechi. Byrnjež nutřkowny areal přemokany był, terasa bistra wězo wopušćena, witaja hosći hišće hač do měrca wšědnje nimo pjatka wot 10 do 16 hodź. do muzeja. Hač do naju rozmołwy njeje sej tam nichtó zastupny lisćik kupił, powěda angažowana sobudźěłaćerka, kotraž swoje mjeno w nowinje čitać nochce. Dnjej do toho bě to cyle hinak. Suche słónčne zymske wjedro bě ludźi prosće k tomu přeprosyło, sej kónc tydźenja do słowjanskeho hrodźišća wulećeć.