Tež lětsa su „Pózdnje změny“ w městach a gmejnach planowane

Wjelkow (CS/SN). „Pózdnja změna“, kotraž wotměwa so w Budyskim wokrjesu nětko hižo 7. lěto, ma wjele přiwisnikow. Zarjadowanje zmóžnja jónkrótnu składnosć za wrotami zawodow pohladać, hdźež ludźo hewak žadyn přistup nimaja. A předewzaćam skići so šansa, wo fachowcow wabić abo zajim pola młodych ludźi zbudźić, kotřiž potom ewentualnje wukubłanje w zawodźe zahaja. Hišće přeco njejsu ludźom w regionje šansy a móžnosće znate, kotrež so w powołanskim swěće Budyskeho wokrjesa skića. Mnozy njewědźa, zo je hospodarska móc w Budyskim wokrjesu wyša, hač w Drježdźanach. Dojězdźowarjo njetrjebaja hižo do stolicy Sakskeje na dźěło jězdźić. Čas, kotryž woni zalutuja, je wjace žiwjenskeho časa, měni jednaćelka wokrjesneho rjemjeslnistwa Sabine Gotscha-Schock.