Prěnje wuslědki Łužiskeho monitora 2024 wčera we Wojerecach předstajili

Wojerecy (SN/at). Region ze serbskej kulturu jako znamjo jónkrótnosće je aspekt kwality stejnišća Łužica. We Łužiskim monitorje 2024 je to 72 procentow sakskich woprašanych podało, dwanaće procentow wjace hač w přepytowanju loni. Přirost wo jednaće procentow, wot 53 na 64 procentow, su za cyłu Łužicu zwěsćili. Stefan Bischoff z Lipšćanskeje towaršnosće MAS Partners je eksplicitnje na to skedźbnił, hdyž je prěnje wuslědki aktualneho Łužiskeho monitora wčera na rewěrowym stajnym blidźe Sakskeje agentury za strukturne wuwiće (SAS) we Wojerecach předstajił. 1 029 wosobow z łužiskich wokrjesow Sakskeje a Braniborskeje a z Choćebuza běchu so k tomu woprašeli.