Awtor dźensa

Křesćan Korjeńk

,,Jědnatka bě łastojčka, jědnatka bě łastojčka ... překlepana Mónika, ... Mónika ...“, spěwa Měrćin Štrawba w swojim spěwje wo žónskej kopańcy. Kelko tajkich ,,Mónikow“ w běhu koparskeje sezony takle mamy, drje njemóže nichtó doličić. Diskusija wo jědnatkach, sprawnych abo mjenje sprawnych, drje nabyła w zašłym času nowe dimensije. Wukładowanje płaćiwych prawidłow drje njeje hišće ženje tak intensiwne było kaž tuchwilu. A hdyž na to pomysliš, kelko zhubjenych abo dobytych pjenjez za jednym tajkim rozsudom tči, potom so njedźiwaš nad telko diskusijemi. Zwěrju sebi twjerdźić, zo so w žanej druhej sportowej družinje telko wo rozsudach sudnikow njediskutuje, kaž w kopańcy.