Radwor so na dalše kročele přikładneho zastarowanja ludnosće hotuje

Radwor (UM/SN/mb). „Małe projekty móža něšto wulke wuskutkować“, praješe bywši sakski minister za energiju, škit klimy, wobswět a ratarstwo, Wolfram Günther (Zeleni), składnostnje spožčenja „eko-myta za přichod 2024“ 249 projektam po cyłej Sakskej. Mjez sydom wu­znamjenjenymi komunami kategorije „ideja“ je tež gmejna Radwor. Minister drje hižo njeamtěruje a wobłuki ministerstwa su w nowym statnym knježer­stwje hinak zrjadowane, ale Radwor so dale z połnej paru na eficientne wužiwanje energije wusměrja. Poprawom bychu myto 2 500 eurow prosće za gmejnski etat wužiwać móhli, dźakowano spěchowanskej směrnicy „energija a klima“ pak bu suma na 10 000 eurow zwyšena.