Loni běše so LEAG z hospodarskimi ministerstwami zwjazka a krajow Braniborska a Sakska na směrnicy za wotškódnjenje koncerna w zwisku ze zakónčenjom zdobywanja energije z brunicy hač do lěta 2038 dojednała. Hač do dźensnišeho pak ke konkretnemu zrěčenju dóšło njeje.

Budyšin (SN/MiP). Hižo lěta dołho běchu so zastupjerjo krajow Sakska a Braniborska kaž tež zwjazkoweho hospodarskeho ministerstwa wo dojednanje na zrěčenje wotškódnjenja z energijowym koncernom LEAG prócowali. Tři dny do lońšich wólbow EU-parlamenta su zasadne dojednanje potom na nowinskej konferency zjawnosći zdźělili. Hač do dźensnišeho pak njeje ke konkretnemu zrěčenju mjez partneromaj w jednanjach dóšło. To wozjewi Redakciska syć Němska (RND) kónc tydźenja na swojej internetnej stronje.