Zwjazk za serbski kulturny turizm z.t. hłownu zhromadźiznu přewjedł

Budyšin (SN/MiP). Na hłownu zhromadźiznu běše Zwjazk za serbski kulturny turizm z.t. (SKT) swojich čłonow a čłonki wčera popołdnju do žurle w Röhrscheidtowej bašće přeprosył. Hnydom na spočatku zarjadowanja wozjewi projektowy manager Franc Golchert přitomnym zwjeselacu powěsć: Towarstwo ma wot lońšeho noweju sobustawow. Z tym zwyši so cyłkowna ličba čłonow na 41. No­wačkaj w zwjazku stej towarstwo Małowjelkowska sotrownja a mały turistiski portal „Lausitzerleben.de“.

Sobuzałožićelka portala, Drježdźanjanka Dagmar Bilke, je so prěni raz na posedźenju SKT wobdźěliła a hnydom swój projekt přitomnym předstajiła. Hromadźe ze swojim synom znazornja turistam z tekstami a krótkofilmami jónkrótnosć Łužicy na polu kultury, přirody kaž tež stawiznow. Hladajo na serbsku rěč a kulturu kaž tež słowjanske stawizny regiona nadźija so Dagmar Bilke na fachowu poradu ekspertow SKT, kotraž ma dale dobrej a lěpšej kwaliće wobsahow na portalu přinošować.