Zaměrowy zwjazk Łužiska jězorina Sakska je minjenu srjedu na regionalnu konferencu Łužiskeje jězoriny w Lubušu prosył. Tema dnja běše projekt přistawneho mosćika při Parcowskim jězorje.

Lubuš (AK/SN). „Twar přistawneho mosćika na wuchodnym brjoze Parcowskeho jězora je chutnje wohroženy“, na to skedźbni Budyski krajny rada a zdobom předsyda zaměroweho zwjazka Łužiska jězorina Sakska Udo Witschas (CDU) na zarjadowanju. Wjace hač 70 hosći z wobłukow turistiki­, politiki, zarjadnistwa, hospodarstwa a towarstwa, ale tež zajimowani wobydlerjo gmejny, běše přichwatało. Do planowanjow a přihotow projekta su gmejna Halštrowska Hola, zaměrowy zwjazk kaž tež Łužiska a srjedźoněmska to­waršnosć hórnistwoweho zarjadnistwa (LMBV) dotal hižo 500 000 eurow spěchowanskich srědkow kraja Sakskeje inwestowali.