Přezahe je smjerć čłona zwjazka serbskich rjemjeslnikow a předewzaćelow Hagena Wjacławka wotwołała. Wšako by 20. julija swoje 60. narodniny swjećił. Hnydom po studiju w Mnichowje je so jako diplomowy inženjer z mysličku nosył, so zesamostatnić. Dwě lěće je hišće nazhonjenja w Drježdźanach zběrał. W lěće 1995 spjelni sej són ze swójskej firmu jako planowar za potrjebu energije. Za to je sej něhdyšu Winarjec pjekarnju w ródnej wsy w Chelnje za trěbne běrowowe rumnosće přetwarił a swojim sobudźěłaćerjam přijomne dźěłowe rumnosće skićił. Jedyn z jeho wulko­projektow bě zastaranje šule, cyrkwje a wjetšiny domjacnosćow z ćopłotu w Radworju. Je to wusahowacy projekt w srjedźnej Europje, zo hodźi so wjes z wotpadkow dejneho kombinata a pólnych bioproduktow z ćopłotu zastarać. Na wjele dalšich tajkich wulkonadawkach, zastaranje z milinu nastupajo, bě jeho firma wobdźělena, na přikład w Mnichowje, Drježdźanach a druhdźe.