Krajny zarjad za ratarstwo na pólnym dnju dopóznaća prezentował

Pomorcy (SN/MiP). Pólnej slědźenskej staciji Sakskeho krajneho zarjada za wobswět, ratarstwo a geologiju (LfULG) w Barće a Pomorcach matej za ratarjow Hornjeje Łužicy wosebity wuznam, wšako přepytuja fachowcy tu wužitne rostliny na samsnych pódach a z podobnymi wjedrowymi wuměnjenjemi, kajkež woni na swojich polach maja. Něhdźe 40 z nich běše sej wčera na pólny dźeń do Pomorc dojěło. Nimo ratarjow a dalšich zastupjerjow ratarskeje branše běše tež 20 wučomnikow ratarstwa Lubijskeho powołanskeho centruma do Pomorc přišło. Woni su tuchwilu w druhim lěće swojeho wukubłanja a wobdźěla so prěni raz na pólnym dnju, naspomni jich wučerka za předmjet rostlinowěda Stefanie Müller na naprašowanje Serbskich Nowin. „Kóždy z nich ma specifisku fachowu temu, z kotrejž ma so dźensa tu rozestajeć“, wona doda.