Na podijowej diskusiji wo dwurěčnosći a serbskej kulturje so wuměnili

Čorny Chołmc (JČ/SN). Łužica je region, kotryž so přeměnja. Pod tymle hesłom je Sakska agentura za wuwiće strukturow wčera zajimcow na rozmołwu do Čornochołmčanskeho Krabatoweho młyna přeprosyła. Kónc wudobywanja brunicy jenož hospodarstwo njezměnja, ale wobwliwuje tež žiwjenje ludźi, kotřiž dyrbja so znowa orientować. Přichod regiona leži mjez zachowanjom hódnotnych tradicijow a zmužitosću, sej něšto noweho zwažić. Wo tutej změnje rěčachu a diskutowachu hosćo na podiju, při čimž bu publikum zapřijaty. Na podiju zastupjeni běchu statna ministerka sakskeho ministerstwa za infrastrukturu a wuwiće kraju Regina Kraushaar (CDU), społnomócnjena za naležnosće Serbow sakskeho knježerstwa Franciska Brechowa, druha přirjadnica Budyskeho wokrjesa dr. Romy Reinisch, direktor Załožby za serbski lud Jan Budar, społnomócnjena za naležnosće Serbow w měsće Wojerecy Diana Karbowa kaž tež předsyda Domowiny Dawid Statnik. Moderaciju je dźiwadźelnik a hudźbnik Tim Gernitz přewzał.