Budyšin (SN/BŠe). W ćahach Trilex na čarje mjez Drježdźanami a Zhorjelcom budu mjena zastanišćow bórze serbsce wozjewjeć . Ideju za to je team Trilex zrodźił, kaž nam na naprašowanje prajichu. „Chcemy sobujěducych bóle na to skedźbnjeć, zo jězdźimy na čarje RB 60 a RE 1 po hornjoserbskim sydlenskim rumje“, Katerina Hagen wuzběhny. Wona je nowinska rěčnica krajneje železnicy, kotraž Trilex wobhospodarja. Swoju ideju bě team syći za serbsku rěč a regionalnu identitu (ZARI) předstajił. Jich partner tam bě Julian Nyča, kotryž je Trilex při zwoprawdźenju podpěrał. Cyle pak projekt hišće zwoprawdźeny njeje. Lětsa, hdyž so jězbny plan změni, je přesadźenje předwidźane. „W zwisku z nahrawanjom nowych datow do systema za informacije sobujěducych tuchwilu wšitke jězdźidła w našej dźěłarni z nowej připowědźu wuhotujemy“, praji Katerina Hagen. Prěnje jězdźidło z hornjoserbskej připowědźu bě wosebity ćah na Dnju Saksow wot 5. do 7. septembra mjez Lubijom a Rumburkom, kotryž sej bě wobchadny zaměrowy zwjazk ZVON skazał.