Předewzaće Yados chce w přichodźe „zelena fabrika“ być

Wojerecy (AK/SN). W lěće 2009 załožene předewzaće Yados w přemysłowym parku w Narću pola Wojerec budźe so w přichodźe z milinu a ćopłotu do dalokeje měry same zastarować. Zawod chce koncept „zeleneje fabriki“ zwoprawdźić. Z pomocu inteligentneho systema, kotryž fotowoltaiku, ćopłotne pumpy a milinarnju za tepjenje zjednoći, chcedźa tole zwoprawdźić. „Chcemy druhim předewzaćam přikład być“, wuzběhny jednaćel zawoda Yados Frank Stiehler za­wčerawšim składnostnje oficialneho za­zběha „zeleneje fabriki“. Twornja ma nětko dwě nowej produkciskej hali z modernej techniku za ćopłotu. Z tym je stejnišćo w Narće nětko wo 24 000 m² wjetše. Wězo trjebaja tohodla wjace sobudźěłaćerjow. Ličba přistajenych ma w přichodnych lětach wot tuchwilu 320 na něhdźe 600 stupać. Něhdźe 20 milionow eurow je firma Yados blisko Wojerec inwestowała. Zawod přisłuša koncernej HOVAL z Liechtensteina. Stejnišćo w Hornjej Łužicy ma změnu wot klasiskeho mašinotwara na klimje přichilenu a digitalizowanu industriju symbolizować.