Strjazow (PB/SN). W srjedźišću delnjoserbskeje Pratyje steji lětsa wjeska Strjažow. Na prezentaciju běchu awtorki a awtorojo kaž tež zajimowani wjesnjenjo tuž do tamnišeje bywšeje šule přichwatali. Někotři ze staršich wopytowarjow kubłanišćo samo hišće ze swójskeho šulskeho časa znajachu. Najwjace z přitomnych pak hakle w běhu prezentacije wjace wo stawiznach šule a wosebje wjeski zhoni. Strjažow je dźěl gmejny Dešno-Strjažow a přisłuša hamtej Bórkowy. Předsydka Strjažowskeho tradiciskeho towarstwa Kerstin Otto-Böttcher witaše wopytowarjow knižneje premjery, wosebje tež lektorku Janku Pěčkec de Levano a redaktorce Ingrid Hustedtowu a Martinu Golašojc. Wonej publikaciju wotměnjejo delnjoserbsce a němsce předstajištej. Němski dźěl wšak nimale trěbny njebě, wšako wjetšina přitomnych delnjoserbsce rozumješe. Pratyja na lěto 2026 wěnuje so pozhubjenju serbšćiny po spočatku knjejstwa nacionalsocialistow runje tak kaž rewitalizaciji rěče wosebje po politiskej změnje. Ingrid Hustedtowa přiwobroća so we wosebitym dźělu protyki dźěćom a młodźinje.