Serbska Łužica ma wysoku turistisku hódnotu

Zhorjelc (SN/MiR). Wšojedne w kotrym počasu – kolesowarjo su při kóždym wjedrje po puću. Wčera je so w Zhorjelcu zahajenske zarjadowanje za „kolesowarski region Hornja Łužica“ wotměło. Na nje bě njedawno wutworjeny turistiski zwjazk Hornja Łužica (TVO) přeprosył. Jeho zaměr je, Hornju Łužicu jako region za kolesowanje wuwić. Na konferency je Běrow za turizm a planowanje wočerstwjenja BTE z Hannovera swoje ideje wo tym předstajił, kak chce tute wuwiće přewodźeć. „To ma za serbski kolesowarski turizm pozitiwny efekt“, zwurazni na naprašowanje SN referent Domowiny za hospodarske a infrastrukturelne naležnosće Pětr Brězan, kotryž je so ze stron Serbow na konferency wobdźělił, „wšako je BTE tež za serbski kulturny turizm skutkował a koncepciju za kolesowarsku šćežku ,Serbske impresije‘ wudźěłał.“