Situacija apotekarjow tež we Łužicy nadal kritiska

Budyšin/Pančicy-Kukow (SN/MiP). Zwjazkowe zjednoćenstwo němskich apotekarskich zwjazkow (ABDA) je za přichodnu póndźelu cyłoněmski protestny dźeń, mjez druhim z akcijemi w Berlinje a Mnichowje, připowědźiło. Apotekarjo chcedźa zjawnosć na swoju eksistencielnu krizu skedźbnić. „Wjace hač 30 procentow apotekow w swobodnym staće ma negatiwnu hospodarsku bilancu“, pisaše Sakski zwjazk apotekow (SAV) minjeny tydźeń w nowinskej zdźělence. Konsekwenca je mrěće apotekow. Něhdźe 120 mějićelow w Sakskej je w běhu minjenych dźesać­ lět swoju lěkarnju zawrěć dyrbjało, tuchwilu eksistuje dohromady hišće 864, piše SAV.