Sakska a Braniborska podpěrujetej iniciatiwu za změnu markoweho prawa

Drježdźany (SN/jp). Sakska a Braniborska podpěrujetej iniciatiwu Schleswigsko-Holsteinskeje w zwjazkowej radźe, zo měła so Němska wo wudospołnjenje markoweho prawa Europskeje unije (EU) starać – na dobro škita narodnych mjeńšin a jich rěčow. Zašłe lěta je so wospjet stało, zo su zawody powšitkowne zapřijeća, kaž na přikład pomjenowanja městnosćow abo slogany a słowa mjeńšinow, jako europsku abo narodnu marku zapisać dali. Tak je na přikład zapřijeće „Öömrang“, kiž pomjenuje sewjerofriziski dialekt kupy Amrum, wulka ameriska firma wužiwała. Lokalny zawod bě nuzowany, swój etablěrowany produkt přemjenować.