Jězbne šule přećiwo reformje wukubłanja, swójby pak ju podpěruja

Budyšin. (SN/hn/jp) Zwjazkowe knježerstwo poruča zwjazkowemu sejmej, zo wot klětušeho januara nowe zakonje za jězbnu šulu płaća. Jedyn z dypkow je, zo njeje hižo trjeba, na wučbu teorije chodźić. Jězbnym šulerjam zmóžnjeja, so prosće online na wotpowědne pruwowanje přihotować. Nimo toho ma so wuběr prašenjow přikrótšić. Hladajo na praktiske hodźiny maja so přiběrajcy simulatory wužiwać, z kotrymiž hodźa so zwučowanja w jězdźidle narunać. Dale su jěz­bne šule winowate, cyłkowne płaćizny transparentnje „na blido połožić“, tak zo je jasnje spóznać, za čo so kelko pjenjez nałožuje. Nimo toho je planowane, zo so praktiske pruwowanje skrótši.