Kanecy. Što je poprawom lěpšina, hdyž swoju rolu njeworaš, ale z pomocu nasypkow wobhospodariš, a što to w praksy woznamjenja? Na tutej a dalše prašenja je minjeny pjatk ratar Rony Rebiš z Kanec we wobłuku stajneho blida zwjazka za ekologiske rólnistwo Gäa z.t. něhdźe dwaceći přitomnym zajimcam wotmołwjał. Woni běchu hłownje z Hornjeje Łužicy a Sakskeje Šwicy, mjez nimi tež někotři Serbja, a skutkuja we wšelakich wobłukach biologiskeho ratarstwa. Na Rebišec dworje mjeztym hižo nimale dźesać lět po zasadach ekologiskeho a regeneratiwneho ratarstwa dźěłaja.