Skrótšenje jězbneho plana busow na dobro porodźernje so dliji

Budyšin (MiJ/LiH). Wolóženje bě drje wulke, jako Budyski wokrjesny sejmik na wurjadnym posedźenju wobzamkny, wohroženu porodźernju w Kamjenskej chorowni z přizwolenjom poł miliona eurow hač do kónca lěta zachować. Tola mjeztym je so wukopało, zo so druhi dźěl tehdomnišeho rozsuda – trěbne přidatne srědki ze šmórnjenjom poskitka zjawneho bliskowobchada wuzbytkować – tak jednorje zwoprawdźić njehodźi. Poprawom měješe so jězbny plan busow na kóncach tydźenja a w prózdninach skrótšić, a to wot spočatka sakskich lěćnych prózdnin, potajkim wot zašłeje póndźele.