Budyšin (SN/BŠe). Nowe impulsy w zwisku z elektrifikaciju železniskeje čary mjez Drježdźanami a Zhorjelcom zapósłanc Sakskeho krajneho sejma Marko Šiman­ (CDU) chwali. Zašły tydźeń je so w Berlinje frakcije přesahowacy parlamentariski kruh pod hesłom „Elektrifikacija železniskeje čary Drježdźany–Zhorjelc“ zešoł. Na posedźenju je so tež parlamentownik z Budyšina wobdźělił. Kruh staj mjez druhim zapósłancaj zwjazkoweho sejma Florian Oest (CDU) a Kathrin Michel (SPD) załožiłoj. Zaměr je, wutwar železniskeje čary aktiwnje forsěrować. Jako rěčnik Hornjołužiskeje předewzaćelskeje iniciatiwy zasadźuje so Šiman hižo lěta wosobinsce za jeje elektrifikaciju. Wón je přeswědčeny, zo Hornja Łužica z toho wulce profituje, dokelž so wubědźowanjakmanosć regionalnych předewzaćow skrući. Poprawom je Němska winowata, elektrifikaciju ručež móžno zwoprawdźić. Zakład za to je statne zrěčenje z lěta 2003, kotrež stej zwjazkowe knježerstwo a Pólskaj wobzamknyłoj.