Serbscy burja rozprawjeja: Žně ječmjenja spokojace, straty pola pšeńcy

Miłoćicy/Chrósćicy (MiJ/LiH/SN). Ratarjo steja tuchwilu tež we Łužicy před mnohimi wužadanjemi. Nimo powyšacych so kóštow za energiju, hnojiwa, picu a mašiny předewšěm přiběrace wjedrowe ekstremy buram starosće načinjeja: Na dołhe fazy horcoty a suchoty slěduja dale a časćišo sylne spadki, kotrež móža pola přepławić, pódy zmjechčić a tak žně wohrožować. Na přikład je so minjenu wutoru z mócnymi zliwkami pokazało, kak spěšnje móže so wjedro změnić a kotre wuskutki to na ratarstwo ma. Přiwšěm je lokalnych rozdźělow, kaž smój w rozmołwje z někotrymi serbskimi ratarjemi zwěsćiłoj. Mjeztym zo so někotři z nich z wysokimi kóštami a sćěhami měnjateho wjedra sylnje bědźa, druzy dotal poměrnje derje z wužadanjemi wobchadźeja.