Wukrajni wobdźělnicy wobkuzłani wo hladanych domach a zahrodach

Njebjelčicy (SN/MiR). Na Haćenkach wosrjedź Njebjelčic rži piła. Jürgen Spottke z Wjelećina a Otakar Výšek z čěskeho Frýdlanta wobdźěłujetaj dub, dalši pak třo młodostni, mjez nimi serbskej holcy. Něšto pozdźišo steji zdónk na hórce mjez Haćenkami a nowej pěstowarnju „Jan Skala – Pisane kamuški“. Tam twarja pomoc­nicy gmejny hrajkanske nastroje za dźě­ći. „Koncept za hrajkanišćo mějach hižo přihotowany. Zapřijimamy do njeho tež dźěle ze stareho hrajkanišća, kotrež so hižo njewužiwaja“, powěda Jürgen Spottke. Rězbarska je jenož jedyn z work­shopow, kotrež so we wobłuku 5. mje­zynarodneje dźěłarnički za młodźinu w Njebjelčanskej gmejnje tuchwilu wotměwaja. „Je derje, zo wobsteji składnosć zetkawanja młodostnych ze wšelakich krajow. To měło so časćišo činić“, měni Florian Rynč, kiž pomha při natwarje hrajkanišća. Mjez wobdźělnikami su nimo štyrjoch serbskich holcow a Němca štyrjo młodostni z pólskeho Namysłowa a pjećo z Frýdlanta a Olomouca. Woča­kuja hišće dalšu wobdźělnicu z Moskwy.