Na serbskich zakładnych šulach wuknje nětko 154 abejcejnikow
Chrósćicy/ Ralbicy/ Worklecy/ Radwor/Pančicy-Kukow/ Budyšin (aha/SN/MiR). Přiwzaće šulskich nowačkow je za naše serbske zakładne šule kóžde lěto wospjet přičina, so na tónle dźeń wosebje přihotować. Lětsa zastupi 154 dźěći jako šulerjo do 1. lětnika jedneje z pjeć serbskich zakładnošulskich kubłanišćow. W Chrósćicach haja rjane wašnje, zo šulskich nowačkow, jich staršich a přiwuznych tamni šulerjo w foyeru „Jednoty“ w spalěru z kwětkami witaja. Zwuraznjeja tak integrowanje abejcejnikow na lube wašnje do swojich rjadow. Do toho bě jich farar dr. Friedrich Fischer na swjatočnym nyšporje požohnował.
