Šulerjo zaběraja so z bioindikatorami a ze swójskim přichodom

Ralbicy (SN/MiR). Rozdwojenosć mjez wnučkokmanosću a hospodarskosću je tema, z kotrejž so skupina šulerjow Ralbičanskeje wyšeje šule tuchwilu dokładnje zaběra. Woni wobdźěleja so na swojim kubłanišću na cyłodnjowskim poskitku UNESCO. Tuchwilu přihotuje so jědnaće šulerkow a šulerjow 5. do 9. lětnika na wopyt z Lipšćanskeje Wyšeje šule Paula Robesona. Zhromadnje z tamnišej UNESCO skupinu chcedźa 20. a 21. meje přewjesć wšelake pólne, to rěka slědźenske dźěła.

Hakle zańdźeny tydźeń bě doskónčnje jasne, zo Lipšćenjo do Łužicy přijědu. Byrnjež projekt dołho planowany był, njemějachu za to hnydom trěbne financne srědki. „Nětko pak dóstanu podpěru sakskeho zwjazka UNESCO-šulow a wot šulskeho towarstwa. Jenož mały podźěl maja šulerjo sami płaćić“, rjekny nawoda Ralbičanskeje skupiny, wučer Michał Wałda.