Ze zawrjenjom pěstowarnjow w prózdninach wšelako wobchadźeja

Budyšin/Miłoćicy (SN/MiR). Zawrjene dźěćace dnjowe přebywanišća w lětnich prózdninach – na to maja so starši kóžde lěto znowa nastajeć. Ći jedni nošerjo zawru w běhu prózdnin wšitke swoje zarjadnišća. Tak Serbske šulske towarstwo (SŠT), nošer sydom dnjowych přebywanišćow a wotnožki Ralbičanskeje pěstowarnje w Smjerdźacej. Druzy, kaž Miłočanski Křesćansko-socialny kubłanski skutk (CSB), maja jenož někotre ze swojich domow zawrjene. CSB je nošer 14 dźěćacych přebywanišćow. Potrjechene su lětsa Njebjelčicy, delnje Sulšecy a Šćeńca. „Starši móža swoje dźěći w tym času do druhich pěstowarnjow w nošerstwje CSB dać, a woni tónle poskitk rady wužiwaja“, wujasnja Maik Brězan, zamołwity za zjawnostne dźěło pola CSB.

„W našich zarjadnišćach lětnje něhdźe dźesać dźěći tydźeń abo dwaj do druheje pěstowarnje chodźi“, rozłožuje předsydka SŠT Ludmila Budarjowa. „Dźěći wjesela so na hrajki w druhim domje, kotryž hišće njeznaja, wšako su jara wćipne a nimaja tuž ćeže z nowej wokolinu.“