Wodowe Hendrichecy (SN/BŠe). Lětnje prózdniny su runje nimo a nowe šulske lěto je so zahajiło. Na wosebite wašnje činja to kóžde tři lěta w Radworju. Wuknjacy njejsu w šuli, ale dojědu sej do Wodowych Hendrichec. „To ma samo dwě přičinje“, wujasnja nawodnica wyšeje šule „Dr. Marja Grólmusec“ Hilža Štilerowa. Na jednej stronje maja so šulerjo mjez sobu zeznać a cyłk wutworić. Tole nastupa wosebje nowy 5. lětnik. Runje tak wučerjo šulerjam rozkładuja, kak maja mjez sobu wobchadźeć, a jim tak socialne poćahi wuwědomjeja. Scyła tajke dny zhromadnosć wšitkich šulerjow skrućeja.