Hač do lěta 2025 pobrachuje 99 serbskich wučerjow

Budyšin (SN/CoR). Přirunujo z powšitkownym połoženjom na šulach Budyskeho a Zhorjelskeho wokrjesa nastupajo pobrachowacych wučerjow situacija na serbskich šulach respektiwnje na šulach, kotrež dźěłaja po koncepće 2plus, hišće mjenje abo bóle spokoja. Tak je z dohromady 142 swobodnych městnow, kotrež měješe Sakska kubłanska agentura Budyšin (SBAB) k 1. awgustej zastarać, 86 z přidružnikami wobsadźenych. To je ze 60,7 procentami wjace hač połojca. „Mjeztym su nimale wšitke wučerske městna wobsadźene, jeničce tři su hišće wakantne. Nadźijamy pak so, zo so nam poradźi tež tónle problem w blišim času rozrisać“, rozłožuje Angela Ruscher z SBAB.