Delnjoserbske rěčne kursy wobsteja 65 lět

Dienstag, 27. September 2016
Artikel bewerten
(0 Stimmen)
Nawodnica Šule za delnjoserbsku rěč a kulturu Choćebuz Marja Elikowska-Winklerowa (nalěwo) witaše wčera zajimcow na historiske zarjadowanje.  Foto: Michael Helbig Nawodnica Šule za delnjoserbsku rěč a kulturu Choćebuz Marja Elikowska-Winklerowa (nalěwo) witaše wčera zajimcow na historiske zarjadowanje. Foto: Michael Helbig

Choćebuska Šula za delnjoserbsku rěč a kulturu zhladuje na 65lětne stawizny delnjoserbskich rěčnych kursow.

Choćebuz (SN/MiR). Swjedźenske zarjadowanje wčera w Choćebuskim měšćanskim domje měješe to znate potwjerdźić a nje­znate wotkryć. Zazběh do wědypołneho a zdobom zabawneho podawka po­da Delnjoserbski dźěćacy chór.

Nawodnica Šule za delnjoserbsku rěč a kulturu Marja Elikowska-Winklerowa witaše zastupjerjow měšćanskeho za­rjadnistwa, wosebje pak Domowiny a dalšich serbskich institucijow kaž tež Delnich Serbow, kotřiž běchu jej při slědźenjach rozmołwni partnerojo byli. Wuslědk toho je dźěłowy zešiwk z titlom „65 lět kursy delnjoserbskeje rěče za dorosćenych 1951–2016“, do kotrehož móžeše so wčera wjace hač 70 přitomnych zanurić. Wšako swědča tam nazběrane dokumenty a fota wo stawiznach kursow a wotpowědnych zarjadnišćow, załoženych na iniciatiwu Domowiny.

Na stawizny rěčneje šule dopomni tež dr. Pětš Šurman ze Serbskeho instituta Choćebuz w swojim swjedźenskim přednošku. Mjez druhim skedźbni wón na to, zo bě Maćica Serbska po swojim załoženju wosebje wulku wažnosć na kubłanje Serbow w Hornjej a Delnjej Łužicy kładła. „Hač do zakaza w lěće 1937 měješe wona hódny podźěl na tym, zo měješe delnjoserbšćina při wšěm masiwnym wróćostajenju w šulskim a cyrkwinskim žiwjenju dale swój wuznam.“ Prěnje kursy delnjoserbšćiny běchu so w Hornjej Łužicy přewjedli, a to wot załoženja Serbskeje ludoweje uniwersity 1949 w Chrósće. Wot lěta 1951 wotměwachu so wone w Delnjej Łužicy, a to w Bórkowskim hosćencu „Čorny hodler“. Fotografija, kotraž dokumentuje, kak klawěr a kniž­ny regal k zarjadnišću wjezu, wuwabi po přednošku mjez přitomnymi prašenja a informacije. Marja Elikowska-Winklerowa prošeše jich wo dalše fotografije a dokumenty, kotrež wo kursach a jich wobdźělnikach po wšej Łužicy swědča. Zdobom wona poruči, sej dźěłowy zešiwk dokładnje wobhladać a dodać mjena resp. wopačnosće korigować. „Dyrbiće wšitcy k tomu přinošować, dołhož sće wy tu, kotřiž so hišće dopominaće“, rjekny nawodnica rěčneje šule. A tak dodachu hosćo hnydom mjena zwobraznjenych wosobow. Prašenje, z kotreje přičiny běchu sowjetscy wobsadnicy za swój čas po Druhej swětowej wójnje z Hornimi a Delnimi Serbami rozdźělnje wobchadźeli, poda dohlad do aktualnych wědomostnych slědźenjow. „Zaběramy so tuchwilu z tym, hač je sowjetska komandantura ze Serbami wšelako wobchadźała“, dr. Pětš Šurman zwurazni.

Veröffentlicht in Kubłanje
Bitte anmelden, um einen Kommentar zu posten

Anzeige