Z Donbasa k Serbam

Mittwoch, 12. Oktober 2016
Artikel bewerten
(0 Stimmen)
 Ielyzaveta Stefanova  Foto:    Ielyzaveta Stefanova Ielyzaveta Stefanova Foto: Ielyzaveta Stefanova

Husto jewi so jeje mjeno jako fotoawtorka w SN, dźe-li wo nowostki serbskich studentow w Lipsku a tamnišeho Instituta za sorabistiku. Štó pak je Liza Stefanova, kotraž skutkuje tam z poprawnym mjenom Ielyzaveta Stefanova jako wě­domostna sobudźěłaćerka a přirunuje w doktorskim dźěle Łužicu jako brunicowy rewěr z Donbasom a Waliziskej?

Wotrostła je dźensa 26lětna w měsće Łuhansku w ukrainskej wuhlowej a industrijowej kónčinje Donbasa na ruskej mjezy – dźensa wójnski region, hdźež 2014 konflikt mjez woběmaj krajomaj eskalěrowaše. „Nětko wšitcy powědaja, zo so tam jenož rusce rěči. To pak njetrjechi. Moja maćeršćina je rušćina, smy pak wšitcy w šuli ukrainsce čitali, so roz­mołwjeli a tež rady rockowu hudźbu w ukra­inskej rěči poskali. Moji sobušulerjo, přećeljo a pozdźišo tež komolitonojo njeběchu jenož Ukrainjenjo abo Rusojo, ale tež Gruzinjenjo, Armenjenjo abo Turkojo“, powěda młoda žona.

Stawizny je Liza Stefanova we Łuhansku studowała, pozdźišo tež ciwilne prawo w Kiewje. Stawiznar bě tež jeje nan. Wón zajimowaše so za Kašubow a Serbow, měješe samo Nowy Casnik doma. „Dožiwich jako dźěćo, kak hordy wón bě, jako bě jónu we Łuhansku tři serbske knihi kupił. Jeho zajim je mi dale dał.“ We Wrócławje analyzowaše wona w masterskim dźěle studiju Józefa Leszczyńskeho wo Łužicy w srjedźowěku. Na konferency slawistow ju narěčachu, hač nochce so za stipendij w Lipsku požadać. A tak bě do Serbow dóšła. „Druhdy jewi so serbšćina jako problem, mam ju pak za dobyće. Štož rěčnu politiku nastupa, móže Ukraina hišće něšto wot Serbow přiwuknyć“, je sej Liza Stefanova wěsta. CoR

Veröffentlicht in Kubłanje
Bitte anmelden, um einen Kommentar zu posten

Anzeige