Póndźelu chcedźa w Njebjelčicach prěnje hortowe dźěći witać. Změja jich tam najprjedy dźesać šulerjow z 1. lětnika Worklečanskeje Serbskeje zakładneje šule „Michał Hórnik“.
Njebjelčicy (SN/MiR). Wot prěnjeho dnja šulskeho lěta 2017/2018, přichodnu póndźelu, změja w Njebjelčicach po wjelelětnej přestawce zaso šulski hort, a to w tamnišim dźěćacym dnjowym přebywanišću „Jan Skala – Barbojte kamuški“. Nošerstwo přewozmje Křesćansko-socialny kubłanski skutk Miłoćicy, kotryž wšak je nošer přebywanišća.
Dźesać staršiskich domow ze Serbskich Pazlic, Miłoćic a Njebjelčic je so rozsudźiło swoje dźěćo nětko wšědnje po šuli do Njebjelčic słać. Tři staršiske domy z Njebjelčanskeje gmejny swoje dźěći tam njesćelu. Z Pěskec a Wěteńcy, dalšeju wsow, kotrejž gmejnje přisłušatej, so dźěći za hort w Njebjelčicach přizjewili njejsu.
