Rumnosće w Budyšinje dawno njedosahaja
Budyšin (SN/mwe). Budyski krajnoradny zarjad pyta hromadźe ze zastupjerjemi staršich a sobudźěłaćerjemi wokrjesneje hudźbneje šule nuznje za móžnosćemi, hdźe a kak móhli přichodnje wokrjesnu hudźbnu šulu trajnje zaměstnić. Wažne při tym je, zo bychu wosebje hudźbnym šulerjam zwonka města puće ke kubłanišću tak bliske kaž móžne byli. Hač do kónca lěta chcedźa rozsudźić.
Rumnostna kapacita za nawuknjenje hraća na instrumentach a spěwanje w twarjenju Budyskeho powołanskošulskeho centruma za hospodarstwo a techniku je hižo lěta wobmjezowana. Na jednym boku je ličba rumnosćow, kotrež su jeničce za wužiwanje hudźbneje šule k dispoziciji, njedosahaca. Tuž so hižo tójšto lět šulske rjadownje powołanskeho centruma po šuli za hudźbne hodźiny wužiwaja. To pak bě a je časowych přičin dla poćežowace. Šulske hodźiny traja zwjetša hač do 15 hodź. a dlěje, hudźbna šula pak započnje ze swojej wučbu hižo w 13 hodź.